Samer Abdeljaber, drejtori i Programit Botëror të Ushqimit (WFP) për emergjencat, thotë se ka mjaft ushqime të grumbulluara nëpër kufijtë e Gazës për të ushqyer të gjithë popullsinë, por nuk mund të arrijë në mënyrë të sigurtë popullatën e shkatërruar nga lufta për shkak të dhunës së vazhdueshme dhe kontrolleve të gjera të sigurisë.

“Ne kemi mjaft ushqim përtej kufijve, madje edhe nga Jordania dhe Egjipti, për të qenë në gjendje të mbështesim 2.2 milionë njerëz”, tha Abdeljaber. “Por ne duhet të sigurohemi që të kemi aksesin e duhur në Gaza nga vendkalime të ndryshme, në mënyrë që të mund të arrijmë realisht njerëzit – qofshin ata në veri apo jug apo në zonat qendrore”, shtoi ai, transmeton Arbresh.info.

Ai vuri në dukje se WFP shpresonte të rifillonte në mënyrë specifike operacionet në veri të Gazës, ku i është dashur të pezullojë punën për shkak të kushteve të pasigurta, por ku ka “shumë njerëz në nevojë”.

“Rrugët e sigurta janë një nga kërkesat tona për të vazhduar ndihmën në veri dhe kjo mund të garantohet vetëm nëse ky është një proces i shpejtë”, tha Abdeljaber. “Vonesat në pikat e kontrollit po e bëjnë të pamundur që ne të arrijmë më thellë në veri”, tha ai.

Komentet e tij vijnë mes raporteve se njerëzit në Gaza, veçanërisht në veri, janë përballur me urinë pasi Izraeli ka vazhduar bombardimet e pamëshirshme dhe ka bllokuar shpërndarjen e ndihmave humanitare shumë të nevojshme./AlJazeera