Zbulohet rasti i parë i virusit të lisë së majmunit në SHBA

13:18 | 19 Maj 2022
Lorik Gerbeshi

Rasti i parë i virusit të lisë së majmunit është regjistruar në SHBA në vitin 2022, transmeton Anadolu Agency (AA).

Virusi i lisë së majmunit është zbuluar në shtetin Massachusetts. Departamenti i Shëndetit Publik në Massachusetts ka konfirmuar se ata kanë zbuluar virusin tek një person i cili së fundmi ka udhëtuar në Kanada.

Zyrtarët e institucionit theksuan se po punojnë me Qendrat për kontrollin dhe parandalimin e sëmundjeve (CDC) dhe institucionet përkatëse shëndetësore lokale për të identifikuar kontaktet e mundshme.

“Personi i përmendur i cili është transferuar në spital është në gjendje të mirë dhe rasti nuk paraqet rrezik për publikun”, thuhet në njoftimin e Departamentit të Shëndetësisë Publike.

Brejtësit, përfshirë ata që mbahen si kafshë shtëpiake dhe majmunët mund të bartin virusin dhe ta transmetojnë atë tek njerëzit.