Një zjarrfikës vullnetar ka vdekur, dy të tjerë janë lënduar dhe shumë prona janë shkatërruar pas zjarreve të mëdha që i kanë përfshirë katër rajone australiane të hënën.

Zjarrfikësi vullnetar nga shërbimi i zjarrfikësve në New South Wales vdiq pas rrokullisjes së një kamioni, rreth 70 kilometra në lindje të qytetit Albury. Zyrtarët thanë se kamioni është rrokullisur nga era e fortë. Dy zjarrfikës të tjerë pësuan lëndime në këtë aksident.

Ky rast e çon në dhjetë numrin e viktimave që nga fillimi i sezonit të zjarreve në natyrë. Më shumë se 4.6 milionë hektarë tashmë janë djegur në njërin prej viteve më të rënda në historinë e kontinentit të largët.

Kushtet e motit pritet të rëndohen edhe më shumë të hënën pasdite, ndërsa temperatura ka shkuar mbi 40 gradë në të gjitha rajonet e vendit.

Meteorologët kanë parashikuar që erërat në disa rajone ta arrijnë shpejtësinë prej 120 kilometrash në orë, duke e shtuar rrezikun për zjarre të reja dhe përhapje më të madhe të zjarreve që janë aktive tash për tash, shkruan “The Guardian”, transmeton Gazeta Express.