Kriza kufitare mes Tajlandës dhe Kamboxhias duket se nuk po njeh qetësi, pavarësisht një marrëveshjeje armëpushimi të arritur vetëm një ditë më parë. Autoritetet tajlandeze kanë akuzuar zyrtarisht Kamboxhian për shkelje të qëllimshme të marrëveshjes së armëpushimit, duke raportuar për luftime të reja përgjatë kufirit mes dy vendeve.

Armëpushimi i dakordësuar të hënën synonte t’i jepte fund një konflikti pesëditor, i cili deri tani ka lënë të paktën 33 të vdekur dhe ka detyruar mijëra civilë të largohen nga shtëpitë e tyre.

Kryeministri tajlandez, Phumtham Wechayachai, bëri thirrje për ruajtjen e qetësisë dhe e cilësoi marrëveshjen si një hap drejt zgjidhjes paqësore të tensioneve. “Armëpushimi pasqyron dëshirën e Tajlandës për një zgjidhje paqësore. Ne jemi të angazhuar për ta zbatuar atë me mirëbesim nga të dyja palët”, deklaroi ai.

Megjithatë, ushtria tajlandeze raportoi se forcat kamboxhiane kanë ndërmarrë sulme gjatë natës në disa pika përgjatë kufirit, duke shkelur marrëveshjen. Sipas deklaratës së ushtrisë, trupat tajlandeze nuk kanë reaguar ushtarakisht, duke respektuar armëpushimin, por janë qëlluar nga ana tjetër deri në orët e mëngjesit të së martës.

Nga ana tjetër, Ministria e Mbrojtjes e Kamboxhias ka mohuar akuzat, duke deklaruar për agjencinë AFP se nuk ka pasur përleshje të armatosura pas hyrjes në fuqi të armëpushimit.

Sipas marrëveshjes së nënshkruar, të dyja palët u angazhuan të tërheqin trupat nga zonat e tensionuara dhe të lejojnë monitorim të pavarur për të shmangur përshkallëzimin e mëtejshëm të konfliktit.

Situata në kufi mbetet e tensionuar, ndërsa komuniteti ndërkombëtar vëzhgon me shqetësim zhvillimet dhe bën thirrje për respektimin e marrëveshjes dhe rivendosjen e stabilitetit./euronews.al