Burri i akuzuar për përpjekje për atentat ndaj presidentit amerikan Donald Trump vitin e kaluar, është shpallur këtë të martë fajtor nga gjykata.

Ryan Wesley Routh u arrestua në shtator të vitit 2024, pasi një agjent i Shërbimit Sekret e pa atë në disa shkurre pranë Trump International Golf Club në Florida, në një kohë kur Trump ishte duke kandiduar për president. Routh, që u gjet me një pushkë, u akuzua për përpjekje për vrasjen e një kandidati kryesor presidencial, sulm ndaj një oficeri federal dhe shkelje të ligjeve të armëve.

MSNBC shkruan se një juri e shpalli Routh fajtor për të pesë akuzat, dy prej të cilave mbartin dënimin maksimal me burgim të përjetshëm.

Megjithëse nuk kishte asnjë përvojë ligjore, Routh u përfaqësua vetë në gjyq dhe thirri vetëm tre dëshmitarë: një instruktor snajperi dhe dy ish-punonjës të tij. Gjyqtarja Aileen M. Cannon, e ndërpreu disa herë Routh gjatë deklaratës hapëse dhe gjatë marrjes në pyetje të dëshmitarëve.

Sipas agjentit të Shërbimit Sekret që e pa i pari, Trump ishte duke luajtur golf në momentin kur Routh u arrestua. Arma e gjetur nga agjentët kishte një teleskop, një karikator të zgjatur dhe një numër serial “të fshirë dhe të palexueshëm”, sipas FBI-së. Në deklaratën e Departamentit të Drejtësisë thuhet se agjentët gjetën gjithashtu dokumente që përfshinin një listë me dorëshkrim të datave kur Trump pritej të paraqitej.

Një dëshmitar njoftoi autoritetet se Routh i kishte lënë një kuti që përmbante një letër me dorë, e cila thoshte: “E dashur Botë … Kjo ishte një përpjekje për vrasjen e Donald Trump, por më vjen shumë keq që dështova”.

“Nuk kam dashur kurrë të vras askënd,” argumentoi Routh në gjykatë dhe tha se gjëja e vetme për të cilën ishte fajtor ishte që “kujdeset thellësisht për këtë vend.”

Ky incident ishte përpjekja e dytë për atentat ndaj Trump-it gjatë vitit të kaluar, pasi ai i mbijetoi një tjetër atentati në korrik, gjatë një mitingu në Butler, Pensilvani, kur një plumb i kaloi pranë veshit.