Zërat në Parlamentin e brishtë spanjoll bëhen gjithnjë e më antagonistë në debatin rreth vazhdimit të gjendjes së jashtëzakonshme

Përderisa shifrat e reja sot për vdekjet nga koronavirusi në Spanjë tejkaluan 15 mijë, debati parlamentar mbi krizën në vend u shndërrua në armiqësor dhe me akuza, transmeton arbresh.info.

Të dhënat e qeverisë së re njoftuan për 683 vdekje që nga e mërkura, që është më e ulët se një ditë më parë, 757, por duke rritur numrin e përgjithshëm të vdekjeve të Spanjës në 15.283.

Numri i rasteve të reja të konfirmuara u rrit me rreth 5.700, duke çuar numrin e përgjithshëm të rasteve mbi 100 mijë.

Në bazë të numrit të banorëve, Spanja ka numrin më të madh të vdekjeve në botë.

Duke debatuar për vazhdimin e gjendjes së jashtëzakonshme deri më 26 prill, një veprim i cili pritet të kalojë gjerësisht, zërat në Parlament ishin dukshëm armiqësore në krahasim me debatet për dy vazhdimet e mëparshme.

“Në votimin e parë për vazhdimin e gjendjes së jashtëzakonshme thashë se nuk je vetëm, në të dytën, unë thashë se gjërat nuk po shkojnë mirë dhe sot duhet të them se kjo nuk është rruga e duhur”, tha Pablo Casado, drejtues i Partisë Popullore.

Casado kritikoi mënyrën se si qeveria e trajton krizën, duke akuzuar qeverinë se gënjen dhe kërkoi publikimin e numrit “real” të vdekjeve nga COVID-19.

“Ju nuk keni absolutisht asnjë autoritet moral të kërkoni lojalitet, por megjithatë, ne do të mbështesim masat për luftimin e pandemisë”, i tha Casado kryeministrit spanjoll, Pedro Sanchez.

Drejtuesi i partisë së ekstremit të djathtë Vox akuzoi qeverinë për përhapjen e dezinformatave dhe korruptimin e mediave.

“Ju nuk keni një plan për ta nxjerrë Spanjën nga kjo tragjedi ose për të shmangur mjerimin që do të vijë, ose atë që keni sjellë”, u tha drejtuesve të koalicionit, Santiago Abascal.

Grindja politike nuk u ndal vetëm në kufijtë e Spanjës. Sanchez paralajmëroi se “një nga sfidat më të mëdha në këtë pandemi ka të bëjë me Evropën”, duke thënë se mungesa e solidaritetit mund ta rrezikojë të gjithë Bashkimin Evropian, duke iu referuar ndarjes veri-jug për ndihmat në luftën kundër COVID-19.

Sanchez zyrtarisht bëri thirrje për një takim me të gjithë politikanët dhe aktorët që janë të interesuar të formojnë një “pakt të madh” për tejkalimin e krizës.

Spanja aktualisht drejtohet nga një koalicion i majtë, i cili arriti të formojë qeverinë vetëm me mbështetjen e gjashtë partive më të vogla. Që nga viti 2015, Spanja ka mbajtur katër palë zgjedhje të përgjithshme./AA