Fluturimet ndërkombëtare po përballen me anulime dhe vonesa të shumta pas sulmeve ajrore të Izraelit ndaj Iranit, të cilat kanë çuar në mbylljen e hapësirës ajrore mbi disa shtete të Lindjes së Mesme.

Emirates Airlines ka njoftuar anulimin e të gjitha fluturimeve nga dhe për në Irak, Iran, Jordani dhe Liban, për shkak të situatës së tensionuar në rajon. Edhe aeroportet ndërkombëtare në Dubai po përjetojnë vonesa të ndjeshme, ndërsa pasagjerët këshillohen të kontrollojnë statusin e fluturimeve të tyre përmes kanaleve zyrtare.

Këto masa pasojnë sulmet ajrore izraelite ndaj objektivave bërthamore dhe ushtarake në Iran, çka ka detyruar autoritetet të mbyllin hapësirën ajrore mbi Iran, Irak, Siri dhe Jordani. Si rrjedhojë, shumë linja ajrore janë detyruar të riorientojnë ose anulojnë fluturimet për të garantuar sigurinë e pasagjerëve dhe ekuipazheve.

Autoritetet ajrore ndërkombëtare i këshillojnë udhëtarët të kontaktojnë linjat ajrore për informacion të përditësuar dhe të shmangin udhëtimet drejt këtyre vendeve derisa situata të stabilizohet.