Të paktën 18 persona kanë mbetur të vrarë dhe dhjetëra tjerë janë plagosur në një sulm vetëvrasës me bombë jashtë një qendre arsimore në kryeqytetin afgan, në Kabul.

Shpërthimi ka ndodhur në një qendër edukative private, e cila ofron për studentët arsim të lartë, shkruan BBC, transmeton portal arbresh.info

Ndërtesa në zonën mbizotëruese shia myslimane Dasht-e-Barchi zakonisht pret qindra studentë.

Autoritetet shëndetësore kanë theksuar se numri i viktimave mund të rritet.

Grupi i Shtetit Islamik ka marrë përgjegjësinë e sulmit, duke postuar mesazhe në kanalet e tyre të mediave sociale, por ende nuk është dhënë asnjë provë.

“Një bombardues vetëvrasës donte të hynte në qendrën arsimore,” tha zëdhënësi i ministrisë së brendshme Tariq Arian në një deklaratë, raporton agjencia e lajmeve AFP.

Zëdhënësi shtoi se sulmuesi u identifikua nga rojet e sigurisë “pas së cilës ai shpërtheu eksplozivët e tij në një rrugicë”.

Sipas banorëve, sulmi ka ndodhur në kohën kur studentët po hynin dhe po dilnin nga qendra. Afganistani ka parë një rritje të dhunës javët e fundit, me shumicën e sulmeve të kryera nga Talibanët. Dhuna kërcënon të rrezikojë bisedimet e paqes midis forcave qeveritare dhe Talibanëve në kryeqytetin e Katarit, Doha./arbresh.info/