Shtëpia e Bardhë ka insistuar se beson që Rusia vazhdon të përbëjë kërcënim për Shtetet e Bashkuara, në mesin e konfuzionit që është krijuar pas komenteve të presidentit amerikan, Donald Trump.

Trump fillimisht duket të mos jetë pajtuar me agjencitë amerikane të inteligjencës kur është përgjigjur “jo” në pyetjen nëse Rusia vazhdon të shënjestrojë zgjedhjet amerikane.

Më vonë Sekretarja për Media e Shtëpisë së Bardhë, Sarah Sanders ka thënë se Trump është përgjigjur me “jo” kur i janë kërkuar më shumë pyetje.

Në ditët e fundit lideri amerikan është përballur me kritika rreth komenteve të tij të fundit për Rusinë.

“Presidenti dhe administrata e tij janë duke punuar vazhdimsht për t’u siguruar që Rusia të mos ndërhyjë në zgjedhjet tona, ashtu siç kanë bërë në të kaluarën”, ka thënë Sanders në një konferencë për media.

Të martën, Trump ka thënë se është keqkuptuar gjatë samitit të së hënës me homologun e tij rus, Vladimir Putin, kur ka mohuar ndërhyrjen ruse.

Samiti i së hënës në Helsinki ka shënuar takimin e parë mes liderit të SHBA-së dhe atij të Rusisë nga viti 2010.