Më shumë se 50 vende kanë kontaktuar Shtëpinë e Bardhë për të nisur negociatat për çështjen e taksave doganore, tha sot këshilltari ekonomik i Shtëpisë së Bardhë, Kevin Hassett.

Një normë universale prej 10% të taksës doganore hyri dje në fuqi.

Ajo do të ngrihet, nga e mërkura, për disa dhjetëra partnerë kryesorë tregtarë të Shteteve të Bashkuara, veçanërisht Bashkimin Evropian (20%) dhe Kinën (34%), me vendim të Donald Trump.

”Vendet që kanë propozuar hapjen e diskutimeve e bëjnë këtë sepse e kuptojnë se do të pësojnë mbi kurrizin e tyre një pjesë të mirë të këtyre detyrimeve doganore”, pohoi drejtori i këshillit kombëtar ekonomik, i cili shoqëron presidentin amerikan për politikën ekonomike.

Kevin Hassett kundërshtoi kështu tezën sipas së cilës këto detyrime të reja doganore do të penalizojnë kryesisht ekonominë amerikane.

“Unë nuk mendoj se do të shohim një efekt të madh te konsumatorët në Shtetet e Bashkuara”, këmbënguli këshilltari, i intervistuar në kanalin ABC.

Shumica e ekonomistëve presin që këto taksa të reja mbi produktet e importuara në Shtetet e Bashkuara të shkaktojnë një përshpejtim të inflacionit dhe të frenojnë konsumin.

“Mund të ketë rritje çmimesh”, pranoi Kevin Hassett, për të cilin këto tarifa doganore janë një mënyrë për të “trajtuar punonjësit (amerikanë) në mënyrë të drejtë” dhe ”për t’i mbrojtur ata nga konkurrenca e pandershme”.

I pyetur pse Rusia nuk ishte në listën e vendeve të tatuara, këshilltari ekonomik theksoi negociatat e vazhdueshme me Moskën dhe Kievin për luftën në Ukrainë.

“Unë mendoj se presidenti mori një vendim për të mos përzier dy çështjet. Kjo nuk do të thotë se Rusia, për aq kohë sa të jetë e mundur, do të trajtohet shumë ndryshe nga çdo vend tjetër”, tha ai.

Presidenca shpjegoi të mërkurën se vende të tilla si Bjellorusia, Kuba, Koreja e Veriut dhe Rusia) nuk u përmendën në listën e të drejtave, sepse ato janë subjekt i sanksioneve amerikane, gjë që tashmë bllokon çdo tregti të rëndësishme.