Shtetet e Bashkuara të Amerikës kanë publikuar imazhe satelitore dhe kanë cituar shërbimet e zbulimit për të mbështetur aludimet se Irani qëndron pas sulmeve mbi rafineritë saudite të naftës. Vetë Irani, mohon përfshirjen në sulmet ajrore të së shtunës, që u morën përsipër nga rebelët Houthi në Jemen.

Por, një zyrtar amerikan, thotë se drejtimi dhe përmasat e sulmit, hedh dyshime mbi përfshirjen e rebelëve Houthi. Ndërkohë edhe vetë sauditët thonë se armët e përdorura në sulme, vinin nga Irani. Në një konferencë për shtyp në Riad, zëdhënësi i koalicionit saudit, që është angahzuar në Jemen, Turki al Maliki, tha se armët kishin ardhur nga armiku i hershëm i mbretërisë, Irani.

“Hetimi po vazhdon dhe të gjitha provat dhe pistat trehojnë se armët e përdorura në sulmet terroriste, kanë ardhur nga Irani”, ka thënë Al Maliki.

Sekretari amerikan i Shtetit fajësoi Iranin në fundjavë, por pa dhënë prova, duke bërë që teherani të akuzonte Uashingtonin për mashtrim. Ndërsa në një postim në “Twitter”, të dielën, Trump nuk e akuzoi në mënyrë direkte Republikën Islamike por sugjeroi se mund të kishte një ndërhyrje të mundshme ushtarake pasi autori të mësohej.

Incidenti ka reduktuar furnizimet globale me naftë në masën 5 për qind dhe ka bërë që çmimet të rriten në atë që është rritja më e madhe brenda një dite që nga lufta e gjirit, në 1991. Çmimi i naftës u rrit me 20 për qind, pavarësisht se shënoi një rënie pasi presidenti Trump autorizoi çlirimin e rezervave amerikane. Sidoqoftë, ekziston shqetësimi se çmimet mund të ringrihen nëse tensionet përkeqësohen./tch/