Mijëra banorëve të Hong Kongut do t’u ofrohet një strehim i përkohshëm në SHBA, ka thënë presidenti amerikan, Joe Biden.

Sipas Biden, SHBA-ja do të lejojë vizitorët kinezë të qëndrojnë për një periudhë prej 18 muajsh, pasi sipas tij, liritë e Hong Kongut po shkelen nga Kina.

Ai ka thënë se kishte arsye bindëse të politikës së jashtme për të lejuar vizitorët e Hong Kongut të qëndrojnë në Shtetet e Bashkuara, shkruan BBC.

Biden ka akuzuar Kinën se ka minuar proceset dhe institucionet e saj demokratike të mbetura, duke vendosur kufij në lirinë akademike dhe duke goditur lirinë e shtypit.

Ai vuri në dukje arrestimet e mbi 100 personave, përfshirë aktivistë dhe politikanë të opozitës, nën regjimin e ri të sigurisë.

Sidoqoftë, Liu Pengyu, zëdhënësi i ambasadës kineze në Uashington, kritikoi veprimet e qeverisë amerikane, për të cilat ai tha se janë shpërfillje dhe shtrembërim i fakteve si dhe ndërhyrje e madhe në punët e brendshme të Kinës.

Por Maggie Shum, një studente në SHBA, ka thënë se shumë studentë ishin lënë në harresë mes pasigurisë për kthimin në Hong Kong dhe mirëpriti lajmet e së enjtes.

“Ndihem e gëzuar dhe e mirëpres këtë vendim të Biden për të mos na braktisur, SHBA nuk na braktisi,” ka thënë ajo.