Rriten tensionet në Mesdhe, Turqia dërgon dron të armatosur në Qipro

16:01 | 16 Dhjetor 2019

Një dron i armatosur i forcave turke është lëshuar në një aeroport në veri të Qipros të hënën në kohën kur në rajon janë rritur tensionet për shkak të marrëveshjes mes Libisë e Turqisë për qasje në burimet e pasura me gaz natyror në lindje të Mesdheut.

Droni i tipit “Bayraktar TB2” u lëshua në aeroportin “Geçitkale” në Famagusta rreth orës 7 të mëngjesit. Qeveria e Qipros Veriore më parë e kishte autorizuar shfrytëzimin e këtij aeroporti për mjetet fluturuese pa pilot.

Ky veprim i Turqisë erdhi pas nënshkrimit të marrëveshjes me Libinë muajin e kaluar për shfrytëzimin e rezervave të gazit në pjesën lindore të Detit Mesdhe.

Në këtë marrëveshje parashihet territor më i madh në dispozicion të Turqisë, në kundërshtim me pretendimet territoriale të Greqisë dhe Republikës së Qipros, e cila e kontrollon pjesën jugore të ishullit.

Analistët thonë se dërgimi i këtij droni në Qipro është kërcënim ndaj përpjekjeve të rivalëve për të marrjen e të drejtave të nxjerrjes së gazit, pasi Qiproja Jugore, Greqia, Egjipti dhe Izraeli e përjashtuan Turqinë nga Forumi i Mesdheut Lindor për Gazin.

Për më tepër, Turqia më parë i ka dërguar dy anije për nxjerrjen e gazit në këtë rajon, pavarësisht kërcënimit të Bashkimit Evropian për sanksione.

Turqia nuk e njeh Republikën e Qipros, e cila është anëtare e Bashkimit Evropian, dhe thotë se Republika Turke e Qipros Veriore, e cila njihet vetëm nga Turqia, ka të drejtë të nxjerrë gaz në tërë territorin ujor përreth ishullit, shkruan “The Guardian”, transmeton Gazeta Express.

Shpërndaje në rrjete sociale

Lajmet më të lexuara