Është rritur në 16 numri i personave që kanë vdekur nga helmimi me alkool në Bender Abbas, një qytet në jug të provincës Hurmuzgan të Iranit, transmeton Anadolu Agency (AA).

Fatma Nevruziyan nga Fakulteti i Mjekësisë në Hurmuzgan tha se 168 persona janë shtruar në spital që nga nata e së mërkurës për shkak të helmimit me alkool.

Nevruziyan njofton se nga të helmuarit 16 persona kanë vdekur ndërsa 8 të tjerë janë në gjendje të rëndë shëndetësore.

Sipas agjencisë së lajmeve të studentëve iranianë, ISNA, drejtori i policisë në Hurmuzgan, Azizullah Meleki ka njoftuar se kanë filluar hetimet për rastin dhe se janë identifikuar shitësit e alkoolit ilegal.

Meleki ka bërë të ditur se janë ndaluar 3 persona, të cilët janë identifikuar se kanë shitur alkoolin e prodhuar ilegalisht.

Dje ishte njoftuar se 10 persona kanë vdekur nga helmimi me alkool të prodhuar ilegalisht.

Në Iran ndalohet shitja dhe konsumimi i alkoolit, por ka raste të kontrabandimit të alkoolit dhe prodhimit të tij ilegal.

Sipas ligjeve iraniane, prodhuesi, blerësi apo personi që konsumon alkoolin e pret një dënim me burg ose goditje me kamxhik.

Gjithashtu edhe në qytetin Kereç pranë provincës Elburz më 11 shtator 3 persona humbën jetën pasi u helmuan nga alkooli ilegal.