Rreth 12 mijë fëmijë janë vrarë ose janë plagosur në luftën civile 10 vjeçare në Siri, ndërsa miliona të tjerë kanë braktisur shkollën, njoftoi Fondi i Kombeve të Bashkuara për Fëmijët.

Statistikat e zymta që u botuan në një raport të UNICEF-it, janë shfaqur në prag të 10 vjetorit të fillimit të konfliktit në Siri, i cili filloi në mes të marsit 2011, transmeton portal arbresh.info

Lufta vrau gati gjysmë milioni njerëz, plagosi më shumë se një milion dhe zhvendosi gjysmën e popullsisë, ndërsa më shumë se pesë milion sirianë kanë statusin e refugjatit.

Raporti thekson se numri i fëmijëve që shfaqin simptoma të vuajtjes psikosociale u dyfishua në vitin 2020, sepse ekspozimi i vazhdueshëm ndaj dhunës, shokut dhe traumës kishte një ndikim të rëndësishëm në shëndetin mendor të fëmijëve, me pasoja afatshkurtra dhe afatgjata.

Fondi i Kombeve të Bashkuara për Fëmijët gjithashtu deklaroi se gati 2.45 milionë fëmijë në Siri dhe rreth 750 mijë fëmijë të tjerë që ndodhen në vendet fqinje nuk e vazhdojnë shkollën, nga të cilët 60 përqind janë djem.

U tha gjithashtu se situata për një numër të madh të fëmijëve dhe familjeve është ende e pasigurt dhe se pothuajse 90 përqind kanë nevojë për ndihmë humanitare, e cila është një rritje prej 20 përqind vetëm nga viti i kaluar./arbresh.info/