Presidenti irakian, Barham Salih, ka deklaruar se është i gatshëm të japë dorëheqje para parlamentit nga shkaku i protestave disamujore që kanë shpërthyer në mbarë vendin, raporton Anadolu Agency (AA).

Sipas një burimi të mirëinformuar në parlamentin e Irakut, i cili foli në kushte anonimiteti, “Salih do të japë dorëheqje nëse vazhdon presioni të rritet”.

“Presidenti thotë se ai preferon të japë dorëheqje në vend që të emërojë një kandidat që protestuesit refuzojnë ta pranojnë”, theksoi burimi.

Sot, një grup i aktivistëve kundërshtuan kandidatin për kryeministër Asaad Al-Eidani, duke theksuar se ai ishte përgjegjës për vrasjen e protestuesve në Basra, ku ai është guvernator.

Ministri në largim i Arsimit, Qusay al-Suhail, dje refuzoi emërimin e tij për kryeministër të ri të Irakut.

Që nga fillimi i muajit tetor, Iraku është tronditur nga protestat masive me anë të të cilave irakianët shprehin revoltën kundër kushteve të dobëta të jetesës dhe korrupsionit. Protestat detyruan kryeministrin Adel Abdul-Mahdi të japë dorëheqje.

Sipas Komisionit të Lartë të Irakut për të Drejtat e Njeriut, të paktën 496 persona janë vrarë dhe 17 mijë të tjerë janë plagosur që nga fillimi i protestave.