Papa Leo ka përsëritur thirrjen e tij për një armëpushim në Ukrainë, të paktën gjatë ditës së Krishtlindjes.

Duke folur përpara gazetarëve, Ati i Shenjtë theksoi se “E përsëris apelin tim për të gjithë njerëzit vullnetmirë: që të kremtohet një ditë paqeje, të paktën në ditën kur lindi Shpëtimtari. Që të jetë një ditë paqeje në të gjithë botën.”

Papa shprehu trishtimin e tij të thellë që, sipas tij, “Rusia, me sa duket, në ditët e fundit nuk e ka pranuar kërkesën për një armëpushim për Krishtlindje.”

Papa u bëri thirrje të gjitha palëve në konflikt, si dhe “të gjithë njerëzve me vullnet të mirë”, që të ndalojnë luftimet të paktën për festën e Krishtlindjes.

“Ju kërkoj edhe një herë të festoni ditëlindjen e Shpëtimtarit si një ditë paqeje. Qoftë një ditë paqeje në të gjithë botën”, tha ai.

Kjo nuk është hera e parë që Papa apelon për një armëpushim të përkohshëm në Ukrainë, duke theksuar vazhdimisht nevojën për dialog dhe për mbrojtjen e civilëve.