Organizata e Kombeve të Bashkuara ka bërë thirrje që t’i jepet fund humbjes së pakuptimtë të jetës në Irak në kohën kur numri i personave të vrarë gjatë protestave i është afruar shifrës 100.

Protestuesit në Irak thonë se kanë dalë në rrugë për shkak të papunësisë, shërbimeve të dobëta publike dhe korrupsionit të lartë në qeveri.

Jeanine Hennis-Plasschaert, kryetare e Misionit Asistues të Kombeve të Bashkuara në Irak, tha: “Pesë ditë vdekje dhe lëndime, kjo gjë duhet të ndalet”, duke shtuar se personat përgjegjës për shkaktimin e viktimave duhet të përgjigjen para drejtësisë.

Raportohet se pesë njerëz janë vrarë vetëm gjatë përleshjeve të fundit mes policisë dhe protestuesve në Bagdad. Thuhet se forcat e sigurisë përsëri kanë përdorur gaz lotsjellës dhe plumba lufte.

Së paku 99 persona janë vrarë dhe rreth 99 të tjerë janë plagosur që nga fillimi i protestave të martën e kaluar në kryeqytet para se ato të shpërndaheshin në pjesën jugore të vendit.

Kjo është kryengritja më e përgjakshme në Irak që nga shpallja e fitores kundër të ashtuquajturit Shteti Islamik në vitin 2017.

Ndryshe, autoritetet irakiane janë përpjekur t’i kontrollojnë protestat përmes vendosjes së orës policore dhe ndërprerjes së internetit, shkruan “BBC”