Tragjedia ajrore në qytetin perëndimor të Indisë, Ahmedabad, ka marrë përmasa edhe më të mëdha, pasi numri i të vdekurve nga rrëzimi i avionit të kompanisë Air India është rritur në 270. Autoritetet konfirmojnë se vetëm një person ka mbijetuar nga 242 pasagjerë dhe pjesëtarë të ekuipazhit që ndodheshin në bord.

Avioni Boeing 787-8 Dreamliner, që ishte nisur drejt aeroportit Gatwick në Britani, pësoi një rënie të menjëhershme të lartësisë pak sekonda pas ngritjes, përpara se të shpërthente në flakë dhe të përplasej mbi ndërtesat përreth, duke goditur konviktin e një kolegji mjekësor.

Ngjarja përfaqëson aksidentin më të rëndë ajror në dekadën e fundit në shkallë botërore.

Pamjet nga vendi i ngjarjes tregojnë dëme të mëdha dhe përpjekje intensive të ekipeve të shpëtimit për të gjetur trupat e pajetë.

Deri tani, 270 trupa janë nxjerrë nga rrënojat, ndërsa shumë prej tyre janë të karbonizuar rëndë, duke e bërë identifikimin të vështirë.

Mjekët kanë nisur analizat dentare dhe profilizimin e ADN-së për të ndihmuar në identifikimin e viktimave. Autoritetet lokale kanë pranuar se procesi do të marrë kohë, ndërsa familjarët e viktimave po presin jashtë spitaleve për të marrë informacion rreth të afërmve të tyre./CNN