Në 24 orët e fundit, në Greqi është shënuar një rekord i ri ditor prej 21.657 personash të infektuar me COVID-19, që është më shumë se dyfishi në krahasim me një ditë më parë.

“Lloji i virusit korona Omicron është i përhapur, ndaj duhet të jemi të përgatitur dhe që këto shifra të mos shkaktojnë panik”, tha për ERT TV ministri grek i Shëndetësisë Thanos Plevris, raporton Reuters.

Vendi raportoi 9.284 raste të hënën, kur qeveria greke njoftoi se masa më të rrepta antiCOVID do të futeshin nga 3 deri në 16 janar për të luftuar infeksionet, kryesisht të synuara në klubet e natës.

Të gjitha festimet e Krishtlindjes dhe Vitit të Ri në vende publike janë gjithashtu të ndaluara në vend, si dhe është futur mbajtja e detyrueshme e maskave në mjedise të hapura.

Greqia, e cila i mbijetoi valës së parë të pandemisë vitin e kaluar në një gjendje relativisht më të mirë se disa vende të tjera evropiane, është duke luftuar me një rritje të numrit të infeksioneve javët e fundit, gjë që ka rënduar sistemin e saj shëndetësor.

Që nga fillimi i epidemisë së koronavirusit, në Greqi janë regjistruar gjithsej 1.105.885 persona të infektuar, ndërsa numri i vdekjeve është 20.557.