Bosnja dhe Hercegovina ka të drejtën të vendosë nëse do të jetë anëtare e NATO-s, por Moska rezervon të drejtën të reagojë ndaj një mundësie të tillë sipas interesave të saj.

“Nëse Bosnja dhe Hercegovina vendos të jetë anëtare e ndonjë gjëje, kjo është një çështje e brendshme. Por gjëja tjetër është reagimi ynë. Në shembullin e Ukrainës, ne kemi treguar se çfarë presim. Nëse ka një kërcënim, ne do të reagojmë”, ka deklaruar ambasadori rus në Bosnje e Hercegovinë, Igor Kalabukhov, transmeton portal arbresh.info

Ai beson se siguria në Bosnje është e garantuar nëse situata politike zhvillohet në bazë të dialogut, pa ndonjë lëvizje radikale.

Anëtari boshnjak i Këshillit të Presidencës së Bosnjë-Hercegovinës, Sefik Dzaferovic, i përshkroi komentet e Kalabukhov si një “sulm ndaj integritetit territorial të Bosnjë-Hercegovinës”.
Dzaferovic tha më herët se Bosnja dhe Hercegovina, si anëtare e BE-së dhe NATO-s, do të ishte më e sigurt dhe më e mbrojtur.

Ai i kërkoi BE-së dhe NATO-s që t’i hapin dyert e tyre Bosnje-Hercegovinës dhe vendeve të tjera të Ballkanit Perëndimor, duke thënë se kjo do të parandalojë rreziqet dhe sulmet e ngjajshme me atë të Ukrainës.

Ambasada e SHBA-së në Bosnje dhe Hercegovinë e quajti deklaratën e Kalabuhov një “kërcënim” për Bosnje dhe Hercegovinën.

“Kërcënimet e fundit të ambasadorit rus ndaj Bosnje dhe Hercegovinës janë të rrezikshme, të papërgjegjshme dhe të papranueshme. Asnjë palë e tretë nuk ka fjalë në marrëveshjet e sigurisë midis NATO-s dhe vendeve sovrane,” tha ambasada në mediat sociale.

Ambasada amerikane gjithashtu ka përsëritur mbështetjen e saj për Bosnjen e Hercegovinën./AA/arbresh.info/