Një numër i madh gazetarësh, përfshirë edhe redaktorët udhëheqës kanë dhënë dorëheqje nga ueb faqja e lajmeve Index.

Njoftimi vjen vetëm pasi dy ditë më parë kryeredaktori i kompanisë Szabolcs Dull, u pushua nga puna, transmeton portali arbresh.info.

Punonjësit e kanë përshkuar vendimin nga presidenti i bordit, László Bodolai, si “e papranueshme”.

Të enjten, Index mbajti një takim të stafit për të kërkuar rikthimin e Dull, që “u refuzua kategorikisht”.

Në një letër të hapur, gazetarët thanë se vendimi nënkuptonte se kushtet për funksionimin e pavarur të Indexit nuk ishin më në fuqi.

“Shkarkimi i tij është një ndërhyrje e qartë në përbërjen e stafit tonë, dhe ne nuk mund ta konsiderojmë atë në ndonjë mënyrë tjetër, por si një përpjekje të hapur për të ushtruar presion,” thanë gazetarët e Index në një deklaratë të përbashkët.

“Bordi redaktues gjykoi se kushtet për funksionim të pavarur nuk janë më në fuqi dhe kanë inicuar përfundimin e punësimit të tyre”.

Zëvendëskryeredaktorja e Indexit, Veronika Munk, i tha Euronews Hungarisë se shkarkimi i Dull ishte një arsye e drejtpërdrejtë për vendimin e saj për të dhënë dorëheqjen.

Një marshim dhe tubim janë planifikuar në solidaritet me Indexin.

Ueb faqja ka qenë prej kohësh një objektiv i kryeministrit hungarez Viktor Orban, i cili u përpoq të ushtronte më shumë kontroll mbi industrinë e transmetimit dhe medias në vend, sipas Associated Press.

Javët e fundit kompania tha që ndjeu se pavarësia e saj ishte “në rrezik” nga forcat e jashtme./arbresh.info/