Gjatë një interviste televizive, presidenti amerikan, Donald Trump ka ngritur pyetjen mbi angazhimin e Shteteve të Bashkuara, për shembull për mbrojtjen e shtetit të Malit të Zi, në rast se ky shtet i vogël sulmohet.

Derisa gazetari e pyet presidentin amerikan: “Përse im bir duhet të shkojë në Mal të Zi për ta mbrojtur atë vend nga sulmet” Presidenti i përgjigjet: “Të njëjtën pyetje kam shtruar dhe unë vetë”.

Mali i Zi është anëtari i 29-të dhe më i ri i aleancës ushtarake, së cilës iu bashkua qershorin e vitit 2017.

Ndërkohë, në drejtim të deklaratës së presidentit amerikan kanë ardhur reagime të shumta.

Ndër to është edhe një e senatorit amerikan, John McCain, përcjell Telegrafi.

“Populli i Malit të Zi, me guxim, i rezistoi presionit nga Rusia e Putinit për të përqafuar demokracinë. Senati votoi 97 me 2 duke mbështetur pranimin e saj në NATO. Duke sulmuar Malin e Zi dhe duke vënë në pyetje detyrimet tona nën NATO, Presidenti është duke ‘i shërbyer’ Putinit”, ka shkruar McCain. /Telegrafi/