Kryeministrja e Britanisë së Madhe, Theresa May, pritet të anashkalojë Brukselin dhe të sigurojë marrëveshje tregtare me vendet europiane pas Brexit.

Negociatori i lartë i Bashkimit Evropian, Michel Barnier, ka këmbëngulur se Britania duhet të pagujë faturën e divorcit përpara se të diskutohen marrëveshjet tregtare, transmeton portali arbresh.info

Duke thënë se ende duhej bërë “përparim i mjaftueshëm”, ai gjithashtu kërcënoi të shtynte bisedimet tregtare nëse nuk mund të arrihet një marrëveshje mbi të drejtat e shtetasve të BE-së që jetojnë në Britani dhe mbi Irlandën e Veriut.

Megjithatë, mediat britanike shkruajnë se May pritet të anashkalojë Brukselin dhe se po kërkon që të merret direkt me kancelaren gjermane Angela Merkel dhe Presidentin francez, Emmanuel Macron.

Zyrtarët nga qeveria e Britanisë së Madhe kanë theksuar se May do të kërkojë marrëveshje tregtare me disa vende europiane.

Britania e Madhe është duke kaluar në fazën e parë të bisedimeve për ndarjen nga BE-ja, megjithatë, liderët e BE-së kanë shprehur pakënaqësitë e tyre për prezentimin e dobët dhe të paqartë nga ana e Britanisë së Madhe për Brexit./arbresh.info/