Franca ka mohuar shkeljen e një embargo-je të armëve të OKB-së pasi katër prej raketave të saj anti-tank u gjetën në një bazë besnike ndaj një gjenerali të diskutueshëm të Libisë.

Ministria e mbrojtjes e vendit thotë se raketat “të papërdorshme” të bëra në SHBA kurrë nuk kishin për qëllim të kalonin tek ndonjë grup dhe ishin për t’u shkatërruar.

Megjithatë, ato u zbuluan në një kamp në jug të kryeqytetit Tripoli, të përdorura nga forcat besnike ndaj gjeneral Khalifa Haftar.

Forcat e gjeneralit Haftar aktualisht po luftojnë për kontrollin e qytetit. Beteja për Tripolin nisi kur forcat e gjeneralit Haftar filluan një sulm në prill, me qindra të vrarë në muajt që nga ajo kohë.

Katër raketat u zbuluan në qershor, kur forcat besnike ndaj qeverisë së mbështetur nga OKB-ja u futën në kamp, duke nxitur një hetim në Uashington.

Franca pranoi se armët – të cilat mund të përdoreshin kundër tankeve dhe automjeteve të tjera – u përkisnin atyre në një deklaratë të mërkurën.

“Këto armë ishin për mbrojtjen e forcave që ndërmarrin misione të inteligjencës dhe kundër-terrorizmit”, thuhet në deklaratën e ministrisë së mbrojtjes.

Franca gjithmonë ka mohuar armatosjen e forcave të gjeneralit Haftar, por ka ofruar mbështetje diplomatike.