Një pilulë eksperimentale për trajtimin e Covid-it e zhvilluar nga kompania amerikane Pfizer ul rrezikun e shtrimit në spital ose vdekjes me 89% te të rriturit e pambrojtur, sugjerojnë rezultatet e provave klinike.

Ilaçi – Paxlovid – është menduar për përdorim menjëherë pas shfaqjes së simptomave te njerëzit me rrezik të lartë të sëmundjes së rëndë, transmeton arbresh.info

Krejt kjo një ditë pasi rregullatori i barnave në Mbretërinë e Bashkuar miratoi një trajtim të ngjashëm nga Merck Sharp dhe Dohme (MSD).

Pfizer thotë se i ndërpreu provat herët pasi rezultatet fillestare ishin kaq pozitive.

Mbretëria e Bashkuar ka porositur tashmë 250,000 kurse të trajtimit të ri Pfizer së bashku me 480,000 kurse të tjera të pilulës molnupiravir të MSD.

Ilaçi Pfizer, i njohur si një frenues i proteazës, është krijuar për të bllokuar një enzimë që virusi ka nevojë për t’u shumuar. Kur merret së bashku me një dozë të ulët të një pilule tjetër antivirale të quajtur ritonavir, ajo qëndron në trup për më gjatë.

Pfizer tha se planifikon të dorëzojë rezultatet e provës së përkohshme për pilulën e saj tek rregullatori amerikan i barnave, FDA, si pjesë e aplikacionit për përdorim urgjent që filloi muajin e kaluar.

Kryetari dhe shefi ekzekutiv i kompanisë Albert Bourla tha se pilula kishte “potencialin për të shpëtuar jetën e pacientëve, për të zvogëluar ashpërsinë e infeksioneve Covid-19 dhe për të eliminuar deri në nëntë nga 10 shtrimet në spital”./bbc/arbresh.info/