Pas akuzave të bëra nga Presidenti Donald Trump, se Kina nuk po bën asgjë në lidhje me Korenë Veriore, pavarësisht përfitimeve që ka nga Amerika, Kina i është përgjigjur duke i thënë se ‘SHBA-të nuk duhet të ngatërrojnë tregtinë me diskutimet rreth programit bërthamor të Koresë Veriore’.

“Ne besojmë se çështja bërthamore e Koresë së Veriut dhe tregtia e Kinës me SHBA-të janë dy çështje krejtësisht të ndryshme”, tha zëvendësministri i tregtisë, Qian Keming në një konferencë shtypi duke shtuar se çështjet “nuk janë të lidhura dhe nuk duhet të diskutohen së bashku “, transmeton portali arbresh.info

“Në përgjithësi, tregtia e Kinës dhe SHBA-ve, duke përfshirë edhe investimet reciproke, është reciprocikisht e dobishme, prandaj Kina dhe SHBA-të kanë fitime reciproke nga bashkëpunimet dypalëshe”, shtoi ai.

Komentet kanë ardhur pas akuzave të Presidentit Trump, i cili ka kërkuar nga Kina që të frenojë fqinjin e saj të pabindur, Kim Jong-un, por Pekini vazhdon të këmbëngul se dialogu është e vetmja mënyrë që mund të dërgojë drejt një zgjidhje.

Përmes llogarisë së tij zyrtare në Twitter, Trump shkroi se ‘është i zhgënjyer me Kinën’, ndërsa ka kritikuar edhe liderët e mëparshëm të SHBA-ve që janë lejuar ‘tregtinë me Kinën, përderisa ata nuk po bëjnë asgjë në lidhje me Korenë Veriore’./Arbresh.info