Sekretari i Përgjithshëm i NATO-s, Mark Rutte, mbrojti mungesën e Sekretarit të Shtetit të SHBA-së, Marco Rubio, nga bisedimet e sotme në kryeqytetin belg, duke thënë se SHBA-të do të përfaqësohen dhe përfshirja e tyre do të mbetet e fortë.

“Prania e SHBA-së do të ndihet edhe sot. Ata janë vazhdimisht të përfshirë në bisedime”, u tha Rutte gazetarëve ndërsa mbërriti në selinë e NATO-s.

Lidhur me kërcënimet e Presidentit rus Vladimir Putin, i cili mbrëmë deklaroi se është gati për luftë me Evropën nëse është e nevojshme, Rutte shmangu komentimin e secilës deklaratë të udhëheqësit rus dhe, përkundrazi, u përpoq të minimizonte retorikën e tij.

“Nuk është qasja e duhur t’i përgjigjesh gjithçkaje që thotë Putin”, tha Rutte.

Sekretari i Përgjithshëm i Organizatës, megjithatë, vuri në dukje se strategjia për arritjen e një marrëveshjeje paqeje është të vazhdojë presioni mbi Rusinë dhe të sigurojë rrjedhën e vazhdueshme të armëve në Ukrainë, me qëllim forcimin e mbrojtjes së saj.

“Arritja e paqes varet nga mbështetja e vazhdueshme për Ukrainën dhe nga ushtrimi i presionit të vazhdueshëm mbi Rusinë”, theksoi ai.

Sekretari i Përgjithshëm i NATO-s tha gjithashtu se është inkurajuese që bisedimet për përfundimin e luftës në Ukrainë po vazhdojnë, por vuri në dukje se është e nevojshme të sigurohet që Ukraina të jetë në pozicionin më të fortë të mundshëm gjatë negociatave.

“Ukraina duhet të jetë në gjendje të negociojë nga një pozicion force”, vuri në dukje Rutte.

“Moska vazhdon të testojë aftësinë tonë parandaluese, ne përballemi me rreziqe reale dhe të vazhdueshme”, tha Sekretari i Përgjithshëm i NATO-s, dhe vazhdoi duke thënë se Rusia ka shkelur hapësirën ajrore të NATO-s me avionë dhe dronë, ka kryer sabotim dhe ka dërguar anije spiune në ujërat e aleancës.

“Këto veprime janë të pamatura dhe të rrezikshme. Rusia po punon ngushtë me Kinën, Korenë e Veriut dhe Iranin për të prishur shoqëritë tona dhe për të shkatërruar rregullat globale”, tha ai, duke shtuar se po përgatitet për një përballje afatgjatë. (A2 Televizion)