Përfaqësuesja e Lartë e Bashkimit Evropian për Politikën e Jashtme dhe Sigurinë, Kaja Kallas njoftoi sot se paketa e 20-të e sanksioneve kundër Rusisë do të miratohej të hënën, sipas APA.

Kallas tha se sanksionet do të kufizojnë aftësinë e Rusisë për të financuar luftën në Ukrainë.

Sipas saj, bisedimet në Gjenevë me Ukrainën treguan se Rusia nuk ka hequr dorë nga kërkesat e saj maksimaliste.

“Bisedimet në Gjenevë kanë treguar edhe një herë se Moska nuk po largohet nga kërkesat e saj maksimaliste. Rusia po zvarritet, në vend që të ecë drejt paqes”, tha Kallas.

BE-ja po ecën drejt paketës së 20-të të sanksioneve. Ne synojmë ta miratojmë këtë paketë të hënën. Sanksionet tona tashmë kanë hyrë në fuqi dhe masat e reja do ta kufizojnë aftësinë e Moskës për të financuar luftën. Moska nuk është e pamposhtshme”, tha përfaqësuesja e lartë e BE-së për Politikën e Jashtme, Kaia Kallas, në një konferencë për shtyp pas samitit E5 në Poloni.

Më 18 shkurt, përfundoi raundi i tretë i bisedimeve në Gjenevë midis Ukrainës, Rusisë dhe Shteteve të Bashkuara të Amerikës.

Edhe pse i dërguari special i SHBA-së, Steve Witkoff kishte shprehur optimizëm për bisedimet, të cilat zgjatën rreth dy orë, si pala ruse ashtu edhe ajo ukrainase i përshkruan ato si “të vështira”.

Moska dhe Kievi mbeten në mosmarrëveshje për çështjet territoriale dhe kushtet e një armëpushimi të mundshëm në konfliktin 4-vjeçar.

Rusia ka kërkuar kontroll të plotë të Donbasit lindor të Ukrainës, i përbërë nga rajonet Donetsk dhe Luhansk.

Kievi e ka refuzuar prej kohësh këtë kërkesë, pasi për të kjo do të përbënte heqje dorë nga territori sovran ukrainas.

Një tjetër pikë ngërçi në bisedime është statusi i centralit bërthamor të Zaporizhias. Centrali – më i madhi në Evropë – ndodhet në vijën e frontit dhe ka qenë nën kontrollin rus që nga marsi i vitit 2022./Atsh