Japonia, Kina dhe Indonezia kanë njoftuar se janë duke u përgatitur për të ndihmuar në evakuimin e qytetarëve të tyre nga Irani dhe Izraeli, në kuadër të përshkallëzimit të tensioneve mes dy vendeve.

Japonia ka bërë të ditur se po dërgon dy avionë ushtarakë në Xhibuti, në pritje të një transporti të mundshëm ajror të shtetasve japonezë nga Irani.

Ministri i Mbrojtjes, Gen Nakatani, ka deklaruar se ka urdhëruar dërgimin e dy avionëve transportues C-2, së bashku me 120 pjesëtarë të forcave të armatosura, në Xhibuti, ku Japonia ka një bazë ushtarake. Aktualisht, rreth 280 japonezë ndodhen në Iran dhe rreth 1,000 të tjerë në Izrael.

Ndërkohë, Ambasada e Kinës në Izrael ka njoftuar se do të nisë evakuimin e qytetarëve kinezë nga Izraeli përmes transportit me autobus, duke filluar nga e premtja.

Sipas një njoftimi të publikuar në llogarinë zyrtare të ambasadës në platformën WeChat, qytetarët kinezë do të evakuohen përmes pikës kufitare Taba dhe do të kalojnë në Egjipt.

Nga ana tjetër, qeveria e Indonezisë ka bërë të ditur se do të evakuojë qytetarët e saj nga Irani. Ministri i Punëve të Jashtme, Sugiono, ka deklaruar: “Qytetarët tanë janë në rrezik.

Gjatë dy ditëve të fundit, sulmet e Izraelit janë intensifikuar dhe nuk po synojnë vetëm objektiva ushtarake, por edhe civilët.”

Ai shtoi se në Iran ndodhen rreth 386 shtetas indonezianë, kryesisht studentë, shumica prej tyre në qytetin e Qomit.

Ndërkohë, sipas të dhënave të ministrisë, rreth 194 indonezianë janë të vendosur në Izrael, kryesisht në qytetin jugor të Gazës, Rafah./AP