Qendra Mjekësore Soroka në Beersheba, spitali më i madh në jug të Izraelit, ka pësuar një goditje të drejtpërdrejtë nga një raketë iraniane, duke shkaktuar dëme të mëdha dhe plagosjen e dhjetëra personave.

Një zëdhënës i spitalit konfirmoi se ndërtesa ka pësuar “dëme të gjera” në disa zona të objektit. Në një deklaratë publike, autoritetet e spitalit u bënë thirrje qytetarëve që të mos paraqiten në ambientet e tij, për shkak të rrezikut të vazhdueshëm nga raketat dhe gjendjes së dëmtuar të infrastrukturës.

Spitali Soroka, i cili ka mbi 1,000 shtretër, ofron shërbime shëndetësore për rreth 1 milion banorë të rajonit jugor të Izraelit, sipas të dhënave zyrtare të publikuara në faqen e tij të internetit.

Sipas televizionit shtetëror iranian, ky sulm ishte një kundërpërgjigje ndaj një sulmi izraelit ndaj reaktorit të ujit të rëndë në Arak, Iran. Televizioni theksoi se “nuk ka asnjë rrezik rrezatimi” nga objektivi i sulmuar.

Spitali Soroka ishte një nga disa objektiva të goditura nga rreth 20 raketa balistike të lëshuara nga Irani drejt Izraelit.

Ndërkohë, ushtria izraelite ka lëshuar një paralajmërim për qytetarët iranianë, duke i bërë thirrje të evakuohen nga zona përreth reaktorit në Arak. Paralajmërimi u publikua në rrjetet sociale dhe përfshinte një imazh satelitor të uzinës, të shënuar me një rreth të kuq.