India ka regjistruar më tepër se 8800 raste të sëmundjes së “kërpudhave të zeza”, që është vrasëse.

Infeksioni që normalisht është i rrallë, i cili njihet si mukormikozë, ka një shkallë të vdekshmërisë prej 50 për qind, ku disa shpëtohen vetëm duke ia hequr një sy.

Por, në muajt e fundit, India ka parë mijëra raste të mukormikozës që i ka prekur pacientët e rikuperuar apo që po rikuperohen nga COVID-19, raporton BBC.

Mjekët thonë se ka një lidhje mes steroideve që po përdoren për të trajtuar pacientët me COVID dhe infeksionit me mukormikozë. Diabetikët veçanërisht janë në rrezik.

Mjekët i kanë thënë BBC-së se duket se ky infeksion godet 12 deri 18 ditë pas rikuperimit nga COVID.

Shtetet perëndimore të Indisë, Gujarat dhe Maharashtra, kanë raportuar më tepër se gjysmën e rasteve. Së paku 15 shtete kanë raportuar mes tetë dhe 900 raste. Pas rritjes së rasteve, 29 shteteve të Indisë iu është thënë ta shpallin sëmundjen epidemi.

Po mbushen repartet e hapura për të trajtuar pacientët nga kjo sëmundje./Koha/