Hamas pranon të lirojë 10 pengje izraelite

07:25 | 10 Korrik 2025
Q L

Zyrtarë të lartë të Hamasit kanë njoftuar të mërkurën se janë pajtuar të lirojnë 10 pengje izraelite, si pjesë e përpjekjeve për të arritur një marrëveshje armëpushimi në Rripin e Gazës.

Por, sipas tyre, bisedimet mbesin “të vështira” për shkak të “kokëfortësisë së Izraelit”.

Në qendër të diskutimeve janë disa çështje kyçe: lejimi i ndihmave humanitare, tërheqja e forcave izraelite nga Gaza dhe sigurimi i një armëpushimi të përhershëm.

Hamasi e nisi luftën më 7 tetor 2023 me një sulm të përgjakshëm në Izrael, ku u vranë rreth 1.200 persona dhe u morën peng 251 të tjerë. Gjatë armëpushimeve të kaluara janë liruar shumica e pengjeve, ndërsa tani mbeten ende dhjetëra në robëri.

Në anën tjetër, ofensiva izraelite në Gazë ka lënë të vrarë mbi 57.000 palestinezë – më shumë se gjysma gra dhe fëmijë – sipas Ministrisë së Shëndetësisë në Gaza, që kontrollohet nga Hamasi, raporton Reuters.

Kjo ministri nuk bën dallim mes civilëve dhe luftëtarëve, por shifrat e saj konsiderohen si më të besueshmet nga Kombet e Bashkuara dhe organizatat ndërkombëtare për viktimat e luftës.