Ministria e Brendshme e Gjermanisë njoftoi se po përgatit një listë të objekteve publike dhe private që mund të konvertohen në bunkerë, në rast nevoje.

Lista do të përfshijë parkingje, stacione trenash nëntokësore, ndërtesa shtetërore dhe prona private. Po ashtu, është planifikuar që të krijohet një aplikacion për telefonin mobil, i cili do të ofrojë një regjistër digjital të bunkerëve dhe strehimorëve emergjentë.

Sipas një përfaqësuesi të ministrisë, qytetarët do të inkurajohen gjithashtu që të kthejnë bodrumet dhe garazhet e tyre në strehimore.

Plani, i cili u raportua për herë të parë nga mediumi gjerman BILD të hënën, është një përgjigje ndaj kërcënimeve të mundshme ndërkombëtare, veçanërisht nga Rusia.

Ndërkohë, një përfaqësues i ministrisë theksoi se nuk ka pasur përkeqësim të situatës së sigurisë, por plani është një projekt i madh që do të kërkojë kohë dhe bashkëpunim me autoritete të ndryshme.

Organizatat e mbrojtjes civile në Gjermani kanë kërkuar zgjerimin e rrjetit të strehimorëve të bombave, pasi aktualisht në vend ka vetëm 579 bunkerë, shumica e të cilëve datojnë nga Lufta e Dytë Botërore.

Plani u miratua në qershor dhe aktualisht po shqyrtohet nga një forcë e veçantë e caktuar për këtë qëllim./abcnews/