Janë gjetur rrënojat e aeroplanmbajtësit amerikan që u fundos gjatë Luftës së Dytë Botërore jashtë brigjeve të Australisë.

USS Lexington u lokalizua në thellësi prej 3 kilometrash në Detin Koral, rreth 800 km jashtë bregut lindor të Australisë, transmeton portali arbresh.info

Anija kishte humbur në Betejën e Detit të Koraleve nga 4-8 maj 1942. Më shumë se 200 anëtarë ekuipazhi vdiqën duke luftuar.

Marina amerikane konfirmoi që anija është gjetur nga një ekip kërkimi udhëhequr nga bashkëthemeluesi i Microsoftit Paul Allen.

Nga fotografitë e shfaqura rrënojat janë të ruajtura mirë.

Zbulimi i Lexingtonit, së bashku me 11 nga 35 avionët e saj, u bë nga kompania e zotit Allen, Vulcan, të dielën.

Beteja e Detit të Koraleve konsiderohet një moment kyç në ndalimin e përparimit të Japonisë në Paqësor gjatë luftës.

Lexington u fundos nga forcat amerikane pasi u godit nga disa silurë japonezë dhe bomba gjatë betejës.

Marina amerikane tha se 216 anëtarë të ekuipazhit vdiqën pasi anija u sulmua. Më shumë se 2.000 të tjerë u shpëtuan./Arbresh.info/