Danimarka vendi i parë në Europë që kthen refugjatët sirianë në shtëpi

23:27 | 2 Mars 2021

Danimarka është bërë vendi i parë në Europë që po kthen refugjatët sirianë në shtëpi, pasi e konsideron atë vend të sigurtë.

Migrantët nga vendi i shkatërruar nga lufta do të dërgohen në kampe deportimi në Danimarkë por nuk do të detyrohen të largohen, transmeton portal arbresh.info

Grupet e të drejtave të njeriut kanë frikë se disa sirianë do të ndiejnë presion për t’u larguar, edhe pse kthimi i tyre është vullnetar.

Danimarka tashmë ka hequr statusin e qëndrimit të 94 refugjatëve sirianë pasi vendosi që Damasku dhe zona përreth tij ishte e sigurt.

Rreth 1,250 sirianë janë të strehuar në Danimarkë.

Ministri danez i Emigracionit, Mattias Tesfaye, tha se refugjatët e dinin që mbrojtja ishte e përkohshme.

“Ne ua kemi bërë të qartë refugjatëve sirianë se leja e tyre e qëndrimit është e përkohshme. Ajo mund të tërhiqet nëse mbrojtja nuk është më e nevojshme”, tha ai për Daily Telegraph.

“Ne duhet t’u japim njerëzve mbrojtje për aq kohë sa nevojitet. Por kur kushtet në vendin e tyre të përmirësohen, një ish-refugjat duhet të kthehet në shtëpi dhe të rivendosë një jetë atje”.

Megjithatë, vendimi ka tronditur aktivistët danezë dhe ata ndërkombëtarë.

Steve Valdez-Symonds, drejtor i të drejtave të refugjatëve dhe migrantëve në Amnesty International UK tha: “Të kërkosh të detyrosh njerëzit të kthehen në duart e këtij regjimi brutal është një fyerje e tmerrshme ndaj ligjit të refugjatëve dhe e drejta e njerëzve për të qenë të sigurt nga persekutimi.

Lufta civile siriane, e cila filloi në 2011, u zhvillua në një konflikt të ashpër dhe nxiti akuzat për krime lufte, midis mizorive të tjera,  edhe për përdorimin e armëve kimike./arbresh.info/

Shpërndaje në rrjete sociale

Lajmet më të lexuara