Shtatë persona kanë humbur jetën pasi një masë e madhe shkëmbore ka rënë mbi varkat me turistë të cilët po shijonin një shëtitje në një lumë në shtetin Minas Gerais në Brazil, transmeton Anadolu Agency (AA).

Si pasojë e fatkeqësisë në lumin Furnas në afërsi të qytetit Capitolio, tre persona figurojnë të zhdukur, bëri të ditur Departamenti i Zjarrfikësit në Minas Gerais në një deklaratë.

Shkëmbi ka prekur të paktën tri varka, duke shkaktuar lëndimin e të paktën 30 personave.

Siç njoftohet, operacionet e kërkimit janë ndërprerë për shkak të uljes së dukshmërisë dhe do të vazhdojnë nesër.

Mediat lokale raportuan se ende nuk dihet identiteti i tri femrave dhe katër meshkujve që humbën jetën.

Pamjet nga rënia e shkëmbit gjigant janë përhapur shpejt në rrjetet sociale.

Megjithëse nuk është specifikuar shkaku i fatkeqësisë, ekspertët supozojnë se shkëmbi ka rënë për shkak të një vorbulle uji ose erozionit të shkaktuar nga ekspozimi i fundit i shtetit Minas Gerais ndaj rrebesheve të mëdha.