Përfaqësuesi i Lartë i Bashkimit Evropian Josep Borrell thotë se përparësia e punës së tij në ballë të diplomacisë së BE do të jetë që të afrojë Ballkanin Perëndimor më afër dhe të arrijë një marrëveshje në dialogun Beograd-Prishtinë.

“Prioriteti im do të jetë të punoj në një marrëveshje gjithëpërfshirëse midis Serbisë dhe Kosovës”, tha Borrell në një letër drejtuar ministrave të jashtëm dhe mbrojtjes të BE, transmeton portali arbresh.info.

Borrell, në një letër para seancës së parë të Këshillit të BE-së, përvijoi pikëpamjen e tij për përparësitë dhe mënyrat e punës brenda politikës së jashtme dhe të sigurisë të BE-së.

Përveç thirrjes për një unitet më të madh dhe një qasje gjithëpërfshirëse ndaj politikës së jashtme dhe të sigurisë të BE-së, Borrell përshkroi gjithashtu dy “përparësi të qarta” që i bëjnë punët e jashtme të BE-së më efikase dhe më strategjike.

“Në radhë të parë, ne duhet të mbështesim me forcë Ballkanin Perëndimor për BE”, tha Borrell në letrën e tij.

Ai shtoi se “ndalimi i konfliktit dhe shërimi i plagëve” në mjedisin e afërt është i rëndësishëm për “stabilitetin dhe sigurinë e vetë BE-së”.

“Prioriteti im do të jetë të punoj në një marrëveshje gjithëpërfshirëse midis Serbisë dhe Kosovës, si dhe në vendosjen e BeH në rrugën drejt stabilitetit të vërtetë”, thotë Borrell.

Ministri i Jashtëm i BE-së tregon se është e rëndësishme që vendet anëtare të BE-së të bien dakord se si të udhëheqin procesin e zgjerimit.

Ai shton se do të punojë me ministrat e jashtëm të BE dhe Komisionerin e Zgjerimit Oliver Varheji./arbresh.info/