Shtëpia e Bardhë po i karakterizon bisedimet e sotme bërthamore midis një këshilltari të lartë të Trump dhe ministrit të jashtëm të Iranit si një hap në drejtimin e duhur dhe ka konfirmuar planet për bisedimet vijuese javën e ardhshme.

“Komunikimi i drejtpërdrejtë” midis të dërguarit të Presidentit Donald Trump për Lindjen e Mesme, Steve Witkoff, dhe ministrit të Jashtëm të Iranit, Abbas Araghchi ishte “shumë pozitiv dhe konstruktiv”, tha Shtëpia e Bardhë në një deklaratë.

Witkoff “i nënvizoi Dr. Araghchi se ai kishte udhëzime nga Presidenti Trump për të zgjidhur mosmarrëveshjet e dy kombeve tona nëpërmjet dialogut dhe diplomacisë, nëse kjo është e mundur”, thuhet në deklaratë, duke i quajtur bisedimet një “hap përpara në arritjen e një rezultati reciprokisht të dobishëm”.

Deklarata e SHBA falënderoi Omanin për rolin e tij ndërmjetës në bisedime dhe theksoi se ishte e pranishme edhe ambasadorja e SHBA në Oman, Ana Escrogima.

Shtëpia e Bardhë tha se të dy palët planifikojnë të takohen përsëri të shtunën e ardhshme.