Një numër gjithnjë e në rritje i të miturve po shfaqen në dosjet e çështjeve terroriste të lidhura me ideologjinë xhihadiste në Belgjikë. Fenomeni u përshkallëzua në vitin 2025, me shërbimet e inteligjencës që raportuan përfshirjen e një fëmije 12-vjeçar në këtë lloj propagande.

Informacioni u bë publik të enjten, në raportin e fundit vjetor të Sigurisë së Shtetit, shërbimit të inteligjencës politike të Belgjikës.

Në këtë vend, i cili është gati të përkujtojë këtë vit 10-vjetorin e sulmeve xhihadiste në Bruksel (32 të vdekur në mars 2016), të cilat u kryen nga e njëjta qelizë si ato në Paris në nëntor 2015, kjo ideologji është ende e pranishme dhe vazhdon të frymëzojë planet e sulmeve, megjithëse këto të fundit duket se janë më pak të “përpunuara”.

“Kërcënimi terrorist i frymëzuar nga salafistët dhe xhihadistët (…) vazhdon të jetë kërcënimi numër një për sa i përket terrorizmit” në Belgjikë, thuhet në raport.

Ky kërcënim ka të bëjë me 80% të dosjeve që Autoritetet kanë përpiluar në kuadër të një sistemi kombëtar të ndarjes së informacionit mbi ekstremizmin dhe terrorizmin, theksohet në të.

Vitin e kaluar, individët e identifikuar si konsumatorë të propagandës xhihadiste nga organizata të tilla si Shteti Islamik ose Al Kaeda ishin “shpesh të rinj, madje shumë të rinj”, me një moshë mesatare prej 22 vjeç, ndërsa “më i riu ishte 12 vjeç”, vazhdon kjo agjenci inteligjence.

Raporti nuk specifikon se çfarë ndjekjeje ligjore iu dha rastit të këtij fëmije 12-vjeçar, i cili u konsiderua si kërcënim.

“Është e qartë se ne jemi veçanërisht të kujdesshëm kur një dosje ka të bëjë me një të mitur” dhe sapo identifikohen këta të dyshuar, “ne sigurisht që i drejtohemi autoriteteve kompetente, për shembull zyrës së prokurorit për të mitur”, tha shefja e Sigurisë Shtetërore, Francisca Bostin, duke folur për stacionin publik radiofonik belg në gjuhën frënge RTBF.

Planet për të kryer akte të dhunshme përfshinin “një numër në rritje të të miturve ” në vitin 2025, të cilët përbënin “rreth një të tretën” e të dyshuarve, tha gjithashtu Sigurimi i Shtetit. Por këta adoleshentë “kishin, në shumicën dërrmuese të rasteve, një plan që kishte përparuar vetëm pak, i ishte nënshtruar një përpunimi minimal ose ishte i vështirë për t’u zbatuar”, shtoi raporti.

“Sot, nuk presim më sulme aq të organizuara sa ato që përjetuam në vitin 2016”, tha Bosten.

Ajo theksoi se autoritetet po shprehin frikë për veprime individuale ose veprime nga “grupe të vogla që shpesh lidhen me aktivitete online”./euronews.al