Shkencëtarët e qeverisë australiane kanë filluar fazat e para të testimit për një vaksinë të mundshme kundër koronavirusit SARS CoV-2, i cili shkakton sëmundjen COVID-19.

Agjencia kombëtare e shkencës australiane CSIRO tha të enjten se testimi në një strukturë biosigurie pritej të zgjaste tre muaj, transmeton portali arbresh.info.

Testimi është duke u ndërmarrë në bashkëpunim me Koalicionin për Inovacionet e Përgatitjes Epidemike (CEPI), një grup global që synon të ndihmojë në zhvillimin e shpejtë të vaksinave kundër sëmundjeve infektive në zhvillim.

CSIRO fillimisht do të testojë dy kandidatë për vaksina që janë zhvilluar nga Universiteti i Oksfordit dhe ndërmarrja amerikane e bioteknologjisë Inovio Pharmaceuticals. Kandidatët u identifikuan nga CEPI në konsultim me Organizatën Botërore të Shëndetit./arbresh.info/