Një vajzë katërvjeçare e zhdukur prej 18 ditësh në një pjesë të largët të Australisë Perëndimore është gjetur e gjallë dhe në gjendje të mirë shëndetësore në një shtëpi të mbyllur, ka bërë të ditur policia.

Cleo Smith u zhduk nga tenda e familjes së saj në një kamping pranë qytetit të Carnarvon më 16 tetor, duke shkaktuar një kërkim masiv, transmeton arbresh.info

Një 36-vjeçar ndodhet në paraburgim dhe po merret në pyetje nga detektivët si i dyshuar.

Policia shkoi në një shtëpi në Carnarvon në orët e para të së mërkurës, pas të dhënave mjeko-ligjore.

“Ata gjetën Cleo-n e vogël në një nga dhomat,” tha në një deklaratë zëvendëskomisioneri Col Blanch nga Policia e WA.

“Një nga oficerët e mori në krahë dhe e pyeti: “Si quhesh?” Ajo tha ‘Emri im është Cleo’.

Vajza është ribashkuar me prindërit e saj, të cilët kishin bërë lutje të dëshpëruara për kthimin e Cleos.

“Familja jonë është sërish e plotë”, ka shkruar në Instagram nëna e saj, Ellie Smith.

Pamjet e policisë të shpëtimit të Cleos e treguan atë “të buzëqeshur” dhe “ashtu siç mund të prisnim në rrethana”, tha komisioneri Chris Dawson, i cili shtoi se ajo po merrte kujdes mjekësor.

Autoritetet thonë se njeriu në paraburgim nuk ka asnjë lidhje me familjen Smith dhe se asnjë akuzë nuk është ngritur.

Shtëpia ku u gjet Cleo është rreth gjashtë minuta me makinë nga shtëpia e saj familjare në Carnarvon, e cila ka rreth 5,000 banorë.

Kryeministri australian Scott Morrison shkroi në Twitter se ishte “lajm i mrekullueshëm dhe lehtësues”. Komisioneri Dawson tha: “Unë mendoj se Australia po gëzohet.”

“Të gjesh një vajzë të vogël – një vajzë të vogël të pambrojtur – pas 18 ditësh. E dini, padyshim që njerëzit mendojnë më të keqen, por më e rëndësishmja shpresa nuk humbi kurrë,” shtoi komisioneri./bbc/arbresh.info/