Shtetet e Bashkuara do të përmbushin obligimin financiar në vlerë mbi 200 milionë dollarësh në Organizatën Botërore të Shëndetësisë deri në fund të shkurtit, njoftoi Sekretari i Shtetit, Anthony Blinken.

“Ky është një hap kryesor përpara në përmbushjen e detyrimeve tona financiare si anëtar i OBSH-së dhe pasqyron angazhimin tonë të ripërtërirë për të siguruar mbështetjen e nevojshme të OBSH-së për të drejtuar përgjigjen globale ndaj pandemisë”, tha Blinken, duke folur në Këshillin e Sigurimit të Kombeve të Bashkuara, raporton CNN.

“Shtetet e Bashkuara besojnë se multilateralizmi, KB dhe OBSH janë thelbësore, jo vetëm si një përgjigje efektive shëndetësore ndërkombëtare dhe humanitare ndaj COVID-19, por gjithashtu edhe për ndërtimin e kapaciteteve më të forta shëndetësore globale dhe sigurisë për të ardhmen”, tha Blinken.

Ai vuri në dukje se kjo gjithashtu pasqyron angazhimin e ripërtërirë të Shteteve të Bashkuara për të siguruar mbështetjen e nevojshme të menaxhimit të krizës së pandemisë së coronavirusit.

Shtetet e Bashkuara, të cilat kanë qenë donatori më i madh i Organizatës Botërore të Shëndetësisë për shumë vite, u larguan nga OBSH-ja vitin e kaluar, gjatë mandatit të presidentit, Donald Trump. Presidenti i SHBA-së, Joe Biden anuloi muajin e kaluar vendimin e tërheqjes nga OBSH-ja. /Telegrafi/