Ambasada e Shteteve të Bashkuara në Bagdad është goditur nga një sulm me raketë, ndërsa nga objekti është parë tym duke u ngritur.

Sipas Al Jazeera-s, një burim i sigurisë në Irak ka thënë se sulmi ka shkatërruar një pjesë të sistemit të mbrojtjes ajrore të ambasadës.

Dy zyrtarë të sigurisë i thanë Associated Press se raketa ka goditur heliportin brenda Ambasadës së SHBA-së në Bagdad.

Predha ka rënë brenda kufijve të ambasadës në Zonën e Gjelbër, distrikti i fortifikuar në qendër të Bagdadit ku ndodhen institucionet qeveritare të Irakut dhe ambasadat e huaja.

Disa orë pas sulmit, Ambasada e SHBA-së në Bagdad u bëri thirrje qytetarëve amerikanë në Irak që të largohen menjëherë, teksa përditësoi alarmin e sigurisë.

“Qytetarët amerikanë që zgjedhin të qëndrojnë në Irak inkurajohen fuqishëm të rishqyrtojnë vendimin e tyre, për shkak të kërcënimit të konsiderueshëm që paraqesin grupet terroriste të milicive të lidhura me Iranin”, thuhet në njoftimin e ambasadës.

Sipas raportimit, ende nuk ka një deklaratë zyrtare nëse ka viktima apo për shkallën e saktë të dëmeve.

Kjo është hera e dytë që Ambasada e SHBA-së në Bagdad sulmohet që nga nisja e luftës.

Të premten, ambasada kishte rinovuar alarmin e sigurisë të nivelit 4 për Irakun, duke paralajmëruar se Irani dhe grupet e armatosura të lidhura me të mund të vazhdojnë sulmet ndaj qytetarëve, interesave dhe infrastrukturës amerikane.

Sulmi i së shtunës ndodhi pak pasi dy goditje shënjestruan Kataib Hezbollah-in, grup i mbështetur nga Irani dhe pjesë e Forcave të Mobilizimit Popullor, duke vrarë tre anëtarë të tij, sipas burimeve të sigurisë për Reuters dhe AFP. / Burimi: Al Jazeera