Dhjetëra lëmoshë kërkues shihen rrugëve të kryeqytetit. Kjo është pamja që po e përcjellë Prishtinën edhe në këto ditë të ftohta dimri, shkruan arbresh.info.

Derisa temperaturat po shënojnë nën minus gradë, fëmijë, gra e burra lëmoshë kërkues  çdo mëngjes zënë cepet e rrugëve që tashmë janë bërë ‘pronë’ e tyre

E të mishëruar me këtë pamje pak kujt prej kalimtarëve u bënte përshtypje të ndalonte e të ndante të hollat me ta.

Arbresh.info ka provuar të flasë me disa nga këta persona, por që frika nga ‘zbulimi i identitetit’ i bënte ata të largoheshin menjëherë.

E një grua rreth të 50-tave ka treguar se vjen nga Shqipëria, e ardhjen në Kosovë e ka arsyetuar se ka pesë fëmijë jetim.

Ndërsa e pyetur rreth mënyrës së ardhjes në Kosovë ajo ka filluar të mbledhë gjërat e saj dhe të largohet.

Ndryshe rrugët e Kosovës e në veçanti ato të kryeqytetit tash e disa vite janë parë si mundësi e mirë e përfitimit edhe nga shtetasit e Shqipërisë.

Të dhënat e viteve të fundit të Policisë së Kosovës kanë treguar se një numër i madh i lëmoshë kërkueseve të identifikuar janë shtetas të Shqipërisë.

Disa herë Policia e Kosovës në mënyrë të organizuar ka kthyer në vendet e tyre dhjetëra lëmoshë kërkues./arbresh.info/