Musliu: Mos e lejoni Cecën, gruan e kriminelit, që të hyjë në Kosovë

00:42 | 8 Dhjetor 2018
Trina Galanxhi

Deputetja e PDK-së, Ganimete Musliu është shprehur kundër ardhjes së këngëtares serbe Svetlana Raznatovic – Ceca në Kosovë.

Musliu u ka bërë thirrje institucioneve që atë mos ta lënë të futet në vend, përcjell Klan Kosova.

“Në Kosovë nuk po vjen këngëtarja Ceca por bashkëshortja e Kriminelit më të tmerrshëm të historisë tonë të re! Po vjen bashkëshortja e Arkanit që ishte udhëheqës paramilitar dhe vrasës mizor i mijëra shqiptarëve në luftën e Kosovës”, ka shkruar Musliu në Facebook.

“Ceca nuk po vjen të prezantojë art ne Kosovë por për të promovuar urrejtje e për të goditur në plagët e hapura të shqiptarëve që i shkaktoi bashkëshorti i saj. Kjo është e pa pranueshme dhe e padrejtë andaj unë nuk mund të heshtë. Apeloj te institucionet tona, mos ja hapni plagët popullit, mos lejoni që bashkëshortja e Kriminelit të hyjë në Kosovë”.