Avni Arifi, shef i stafit të kryeministrit Ramush Haradinaj, ka mohuar se këshilltari i presidentit Trump, i ka dhënë ultimatum prej 48 orësh Haradinajt për të hequr taksen.
Kryeministri Ramush Haradinaj ka biseduar dje përmes telefonit me John Bolton, këshilltar i Presidentit amerikan, Donald Trump.

Telefonata kreut të Qeverisë i erdhi pasi ai po refuzonte të hiqte taksën ndaj produkteve serbe e bonjake.

E, mediat kanë raportuar se Bolton i dha një ultimatum prej 48 orësh Haradinajt për ta hequr taksën, por diçka të tillë e ka mohuar Arifi.

Këshilltari i Kryeministrit ka thënë për Gazetën Express se e demanton një raportim të tillë dhe se nuk ka pasur ultimatum.

Haradinajn e ka marrë në telefon Bolton, pasi takimeve me ambasadorin amerikan, Philip Kosnett dhe pas thirrjes publijke të ambasadës për ta pezulluar menjëherë taksën ndaj Serbisë dhe Bosnjës e Hercegovinës.

Haradinaj po këmbëngul që taksën do ta heq vetëm pasi Kosova të marrë njohjen nga Serbia dhe Bosnja.

Telefonatën e Boltonit, kryeministri Haradinaj ka refuzuar ta komentojë, madje si rrallëherë nuk ka lëshuar komunikatë rreth temave që ka biseduar me njërin nga njerëzit kryesor të presidentit Trump.

Megjithatë bisedën mes tyre e ka konfirmuar nënkryetari i AAK’së, Ardian Gjini, në emisionin Rubikon.