Presidenti i Paris Saint-Germain, Nasser Al-Khelaifi, ka mohuar marrjen e ish-trajnerit të Arsenal, Arsene Wenger, si drejtor sportiv i kampionëve të Francës. 68-vjeçari është i lirë pasi mbylli aventurën pas 22 vitesh në “Emirates Stadium”, gjatë javës së kaluar.

Wenger ka një marrëdhënie shumë të afërt me drejtuesit e PSG dhe shtypi shkroi se ai mund të emërohej si këshilltar tekniko-taktik i trajnerit të ardhshëm Thomas Tuchel. Gjithsesi, në një deklaratë për “L’Equipe”, Al-Khelaifi mohoi gjithçka.

“Ai është një shok i mirë, një mik për ne dhe e admirojmë dhe e respektojmë për të gjithë ato që ka bërë në futboll. Eshtë një njeri i madh, nga të parët që kam kontaktuar kur mendova të blej PSG dhe nuk e harrojë kurrë kur më tha se po marr një diamant për të cilin duhet të dijë si të kujdesem, por ne e kemi një drejtor teknik, Antero Henrique dhe ai do të qëndrojë me ne, ashtu si e kemi një trajner për sezonin e ardhshëm. Wenger nuk do të vijë në Paris,” – tha Al Khelaifi.

Në mes të qershorit, Wenger do të bëj të ditur publikisht se ku do të punojë në vazhdim të karrierës së tij. /telesport/