Dita e martesës së Princit Harry me amerikanen Meghan Markle ka mbërritur.

Ceremonia, ku nipi i Mbretëreshës, i gjashti në linjën e fronit, do të betohet për dashuri dhe nderim të ish-aktores, do të ndiqet nga miliona njerëz në të gjithë botën.

Por, mijëra të tjerë kanë preferuar që të jenë pranë kësaj ceremonie dhe kanë shkuar në Berkshire që në orët e para të mëngjesit. Disa të tjerë kanë ngritur tendat që mbrëmjen e kaluar aty, duke fjetur në të ftohtë vetëm e vetëm për të qenë dëshmitarë të këtij evenimenti.

Ndërkohë, forcat policore kanë krijuar një “unazë” rreth kështjellës.

Mediat britanike shkruajnë se gatishmëria është e lartë mes policisë, ushtrisë dhe shërbimeve të fshehta për të parandaluar sulme të mundshme gjatë ditës së madhe të Harry dhe Meghan.