Kryetari i Asamblesë Kombëtare të Sllovenisë, Milan Brglez, ka pritur sonte në Lublanë kryetarët e Parlamenteve të shteteve të Evropës Juglindore, ndërsa shteti slloven e ka nderuar kryeparlamentarin kosovar Kadri Veseli duke e ulur atë në qendër të takimit, pranë homologut të tij slloven.

Sipas pamjeve të takimit, pjesë e tij është edhe kryetarja e Parlamentit të Serbisë, Maja Gojkoviq, ndërsa shihet e ulir përball kryeparlamentarit Veseli.

I pari i legjislativit kosovar ka bërë të ditur nëpërmjet një statusi në Facebook se gjatë qëndrimit në Slloveni do të marr pjesë në sesionin e pestë të Asamblesë Parlamentare të Procesit të Bashkëpunimit të Evropës Juglindore (SEECP PA).

“Bashkë me homologë dhe deputetë të shteteve të Evropës Juglindore, u takuam sonte në Lublanë, ndërsa nesër do të mbajmë sesionin e pestë të Asamblesë Parlamentare të Procesit të Bashkëpunimit të Evropës Juglindore (SEECP PA).

Gjatë punimeve të SEECP do të paraqes të arriturat e Kosovës dhe progresin e shënuar nga legjislativi në rrugën drejt integrimeve evropiane. Kosova do të kryesojë SEECP në periudhën 2019/2020”, ka shkruar kryeparlamentari Veseli në faqen e tij në Facebook. Ndryshe, pjesë e delegacionit të Kuvendit të Kosovës në SEECP janë edhe deputetë të partive politike parlamentare nga pozita dhe opozita.